Sajak ti Keanaan
Kanggo Jabo sareng Teater Dongkrak
Labirin Aktor
Solali suling bambu
Menyan putih
Mangundang dewa
Dewa-dewa sukma
Widadari
Rante-rante turun ti langit
Rante-rante nu hangit
Sajarah urang
Sajarah wayang nu dibalang-balang ti panggung ka panggung
Kalangkang ting kolebat
Nembrag rupa nu pinuh karahaan jaman
Aeh…..
Rohang-rohang sakabeh jeritan
Dimana tung-tungna peuting
Dimana buah ruhsiah jempling
Iraha roh bisa cicing kalawan tingtrim
Solali suling bambu
Menyan putih
Mangundang dewa
Dewa-dewa sukma
Widadari
Getih ngabayahbah ti dalapan madhab
Seuneu ngahuru suku, leungeun jeung beuheung
Garis-garis nasib
Bau nu rarujit
Pebeulit jeung sakur sora kasakit
Jalan-jalan batu heureut ku rumit
Aduh
Eunya….eunya
Sewang-sewang kudu nyorang hirup
Kudu nguyup peurah dirina sorangan
Amboeng
Rante-rante turun ti langit
Rante-rante nu hangit
Dibeuleum napas manusa nu teu bisa leungit
18 Maret 2008
Gedong Kasenian Tasikmalaya
No comments:
Post a Comment